أهمية السجل التجاري في المشروع

اسمع كثير يقولون لي: “إذا أردت أن تتبع النظام عليك أن تستخرج السجل التجاري لمشروعك”، وأنا بيني وبينكم كنت أضنها بلا فائدة إلى حين بدأ مشروعي الصغير ينجح و يكبر.

أول شيء وزارة التجارة والاستثمار سهلت علينا كيف نقدر نفتح السجل التجاري وصار يمدينا نخلصها كلها بـ 180 ثانية بس! على هذا الرابط: افتح سجلك التجاري الإلكتروني في 180 ثانية

طيب نرجع للشيء المهم ليه نطلع سجل تجاري وليش هو مهم؟

قبل كل شيء إذا تبي تمشي بشكل نظامي لازم يكون عندك سجل تجاري وهو الأساس عشان تكون لك هوية خاصة لمشروعك ولا تقدر تمشي في أي شيء حكومي إلا فيه.

• استقدام: أي مشروع راح تفتحه وهدفك إنه يكبر ويدخل لك أرباح تحتاج تجيب لك ناس يشتغلون وعشان تستقدم لازم يكون عندك رخصة بلدية اللي ما راح تقدر تطلبها إلا إذا عندك سجل تجاري.

مثلا: أنا نورة فتحت محل حق حلويات وابي استقدم عمالة عشان يشتغلون عندي ما أقدر اجيبهم على اسم مشروعي إلا إذا فيه سجل تجاري، ممكن أحد يقول طيب اجيبهم باسمي وافتك من القروشه هذي كلها لكن لو قلنا بتسويها كم راح تقدر تجيب؟ راح تجيب عدد محدود جداً
غير لو كان عندك سجل تجاري ورخصة بلدية راح تقدر تجيب أكثر على حسب المساحة المحل اللي عندك ومنها راح تقدر تكبر مشروعك.

• الثقة: ما في ناس كثار راح يثقون فيك ويوقعون معك عقود أو صفقات بدون ما تكون موثوق عند الدولة بالنهاية هي فلوس راح تدخل و تطلع لذلك السجل التجاري راح يعطيك ثقة.

قد يهمك: 5 أسئلة لمساعدتك في اختيار افضل المشاريع الناجحة للعام القادم 2018

مثال: فتحت مشروع حق تصميم وشغلي مرره بطل وجتني شركة تبي تشتغل معي عشان اصمم لهم فَلما أسوي معهم عقد وعشان أبدأ اشتغل واصمم لهم ويثقون فيني أحتاج يكون عندي سجل تجاري عشان يعطي للطرف الثاني اللي راح تتعاقد معه أنك ثقة ومن وخلاله يوقع معك ومنها يكبر مشروعك.

• التوظيف: لو قلنا إنك بديت لحالك ومشروعك كل ماله يكبر وتحتاج ناس يساعدونك وتبي وموظفين عندك لازم يكون عندك ملف عمل اللي ما تقدر تطلعه الا اذا عندك سجل تجاري وتكون رسمي.

مثال: رحت فتحت مشروع وبديت تشتغل صح ومشروعك كل ماله يكبر فتحتاج ناس كثار وموظفين عشان تقدر تستوعب الشغل الكثر اللي جاك فما تقدر توظف ناس و تبدأ تعطي لهم رواتب وتسجلهم في التأمينات باسم مشروعك بشكل رسمي الا اذا عندك ملف عمل واللي تقدر تطلعه بعد ما يكون عندك سجل تجاري.

• الحقوق: طبعا لازم نحط في بالنا إن في ناس ما تخاف وعادي تغش ولا همها شيء وعشان تضمن حقك كتاجر السجل التجاري راح يضمنها لك.

إقرأ أيضا: أفضل 10 فكرة مشروع صغير مربح بالمملكة العربية السعودية

مثال: فتحتي لك مشروع حق ميك أب وشغلك ماشي مرره حلو وجاك طلب أنك تمسكين ميك اب حق عروس وكتبتي عقدك مع الشركة الثانية واخر شيء طبعا توقيعك لكن ايش يضمن الشركة الثاني ان هالمشروع لك وان هالتوقيع لك انتي في مشروعك؟ السجل التجاري الإلكتروني تلقائيا راح يشترك لك مع الغرفة التجارية وعندهم شيء اسمه تصديق التوقيع يضمن ان هـالمشروع لك انتي وان التوقيع هو بعد لك فراح يقلل من عملية التزوير وتضمنين ان محد راح يزور عقودك وتقدرين تمشين بشكل نظامي.

الفوائد مرره كثيرة من السجل التجاري وقصدي من هذا الكلام كله إن لما تفكر إنك راح تكبر في مشروعك ويكون لك أساس قوي لازم تكون نظامي عشان تبدأ الناس تثق فيك وتضمن حقك وحقها.

أتمنى دائما إن الجميع ما تجيهم مشاكل ويكونون فاهمين ويبدون يشوفون مشاريعهم تكبر وتساعد في اقتصاد البلد وراح نتوسع في السجل التجاري ونذكر أشياء مهمة عنها مستقبلا بإذن الله.

لا تنسى أن تقرأ: أفضل 10 فرص إستثمارية ناجحة عليك أن تبدأها في السعودية

المصدر موقع نورة